Rolls-Royce បង្ហាញវត្តមានផ្លូវការនៅកម្ពុជា
ភ្នំពេញៈ បន្ទប់តាំងបង្ហាញរថយន្តប្រណីតតម្លៃខ្ទង់លានដុល្លារអាមេរិក Rolls-Royce បានបើកដំណើរនៅក្នុងប្រទេសកម្ពុជា ដ៏ក្រីក្រមួយ កាលពីម្សិលមិញ បន្ទាប់ពីបានការប្រកាសនាំចូលផ្លូវការកាលពី ខែមិថុនា ឆ្នាំមុន។
វត្តមានរថយន្តប្រណីតនេះ ត្រូវបានគេព្យាករពីភាពវិជ្ជមានសម្រាប់ទីផ្សារដ៏តូចមួយនេះ។
តាមសូចនាកររបស់ធនាគារពិភពលោកកាលពី ឆ្នាំ២០១៣ ចំណូលសម្រាប់មនុស្សម្នាក់ក្នុងមួយឆ្នាំរបស់កម្ពុជាមាន ១ ០០៦ ដុល្លារ។
កាលពី ខែមិថុនា ក្រុមហ៊ុនរថយន្ត Rolls-Royce បានតែងតាំងក្រុមហ៊ុន HGB Group Co Ltd ជាក្រុមហ៊ុនចែកចាយរថយន្ត Mazda និង Kia នៅកម្ពុជា ធ្វើជាដៃគូជាផ្លូវការ។
ហាងតាំងបង្ហាញនេះមានទំហំ ៥៤០ ម៉ែត្រការ៉េ ស្ថិតនៅតាមផ្លូវលេខ ២១៧។ រថយន្ត Rolls-Royce ម៉ូដែល Phantom ម៉ូដែល Wraith និង Ghost ត្រូវបានតាំងបង្ហាញជាមួយនឹងតម្លៃចាប់ផ្ដើមប្រហែល ៦៥០ ០០០ ដុល្លារ ដល់ជាង ១ លានដុល្លារ។ ក្រុមហ៊ុនក៏បានបង្កើតអគារជួសជុលនៅតាមបណ្ដោយមហាវិថីសហព័ន្ធរុស្ស៊ីផងដែរ។
លោក ចម ប្រសិទ្ធ រដ្ឋមន្ដ្រីក្រសួងឧស្សាហកម្មនិងសិប្បកម្មចូលរួមបើកសម្ពោធកាលពីថ្ងៃម្សិលមិញបានថ្លែងរិះគន់ខ្លាំងៗពីប្រព័ន្ធផ្សព្វផ្សាយព័ត៌មានក្រៅប្រទេសអំពីការនាំចូលរថយន្តប្រណីតដូចជា Rolls-Royce មកកាន់កម្ពុជា ដោយលើកឡើងថា កំណើនសេដ្ឋកិច្ចរបស់កម្ពុជាផ្ដល់ហេតុផលគ្រប់គ្រាន់សម្រាប់វត្តមាននៃយីហោនេះនៅក្នុងទីផ្សាររថយន្តកម្ពុជា។
លោកបានថ្លែងថា៖ «ខ្ញុំធ្លាប់និយាយហើយកាលពីឆ្នាំមុនថា ស្ថានភាពនៅកម្ពុជាឈានដល់ភាពទុំជោរក្នុងការនាំចូលរថយន្តប្រភេទប្រណីតនេះហើយ ដោយសារកំណើនសេដ្ឋកិច្ចរបស់យើងកើន ៧ ភាគរយជាប្រចាំឆ្នាំ ហើយក៏មានការកើនឡើងនៃវណ្ណៈកណ្តាលមួយដែលមានលទ្ធភាព និងទ្រព្យសម្បតិ្តច្រើន ដោយសារការប្រកបអាជីវកម្ម ដែលរកស៊ីបានចំណេញច្រើនឬដោយសារដីឡើងថ្លៃ លក់ដីក៏បានច្រើនបានពីអាជីវកម្មផ្សេងៗទៀតជាច្រើនដែលធ្វើឲ្យប្រទេសកម្ពុជាយើងមានអ្នកមានកាន់តែច្រើន»។
លោកបន្តថា៖ «សារព័ត៌មានអន្តរជាតិថា គ្មានខ្មែរណាមានលុយទិញរថយន្ត Rolls-Royce ទេ ប៉ុន្តែខ្ញុំយកជើងលេខនេះទៅបង្ហាញអស់លោកទៅឃើញហើយ។
ខ្មែរក៏មានអ្នកក្រ ខ្មែរក៏មានអ្នកមានដែរ។ នេះជាទីផ្សារសេរី អ្នកមានគេមានលទ្ធភាពគេទិញទៅ អ្នកដែលក្រខិតខំបន្តទៀត»។
លោកបន្ថែមថា កម្ពុជាជាប្រទេសដែលបានកាត់បន្ថយភាពក្រីក្រលឿនជាងគេក្នុងពិភពលោក ក្នុងចំណោម ១០ ប្រទេស៖ «លឿនជាងគេហើយនៅមានគេថា យើងជាប្រទេសក្រីក្រមិនសមនាំរថយន្តទំនើបៗមកកម្ពុជាទេ។ គេថា ប្រហែលជាគ្មានខ្មែរណាមានលុយទិញទេ ប៉ុន្តែឥឡូវជាក់ស្តែងតាំងពីក្រុមហ៊ុន HGB GROUP បានទទួលសិទ្ធិចែកចាយមក សួរថា លក់បានប៉ុន្មានហើយមិនតិចជាង ២០ គ្រឿងទេ។ ល្បឿននេះលឿនជាងប្រទេសដទៃក្នុងពិភពលោកផង»។
វត្តមានរថយន្តប្រណីតនេះ វាបានបង្ហាញពីគម្លាតដ៏សែនឆ្ងាយរវាងអ្នកមាននិងអ្នកក្រក្នុងប្រទេសក្រីក្រមួយ។
ថ្លែងទៅកាន់អ្នកយកសារព័ត៌មានកាលពីម្សិលមិញ លោក Temmy Wiradjaja អ្នកគ្រប់គ្រងទូទៅរបស់ក្រុមហ៊ុន Rolls-Royce Motor Cars Phnom Penh រំពឹងថា តម្រូវការរថយន្ត Rolls-Royce នៅតែខ្ពស់សម្រាប់ទីផ្សារកម្ពុជា។
លោក Pily Wong អនុប្រធានសហព័ន្ធឧស្សាហកម្មរថយន្តកម្ពុជាថ្លែងថា តួលេខលក់រថយន្ត Rolls-Royce ២០ គ្រឿងនៅក្នុងប្រទេសកំពុងអភិវឌ្ឍដូចជាប្រទេសកម្ពុជាគឺ «ការភ្ញាក់ផ្អើលមួយ»។
លោកបញ្ជាក់ថា៖ «រថយន្ត ២០ គ្រឿងគឺមិនច្រើននោះទេបើធៀបនឹងទីផ្សារធំៗ ប៉ុន្តែយើងត្រូវចាំថា រថយន្ត Rolls-Royce ជាយីហោពិសេសបំផុតសម្រាប់ផ្គត់ផ្គង់ឲ្យអ្នកមានទ្រព្យច្រើន។ ក្នុងប្រទេសអភិវឌ្ឍន៍មួយ លទ្ធផលរបស់ពួកគេគឺពិតជាធ្វើឲ្យមានការភ្ញាក់ផ្អើលជាពិសេសនៅកម្ពុជា»។
Rolls-Royce ជាយីហោរថយន្តប្រណីតចុងក្រោយដែលចូលមកក្នុងទីផ្សាររថយន្តថ្មីរបស់កម្ពុជា ដែលរួមជាមួយនឹងយីហោ BMW យីហោ Audi យីហោ Mercedes យីហោ Porsche យីហោ Land Rover និងយីហោ Jaguar ៕
Comments
Post a Comment