ចិនស្វាគមន៍អាមេរិកចូលរួមក្នុងធនាគារអភិវឌ្ឍន៍ថ្មី
ក្រុងប៊ែរឡាំងៈ លោក Shi Yaobin អនុរដ្ឋមន្ត្រីហិរញ្ញវត្ថុចិន បានប្រាប់សារព័ត៌មាន អាល្លឺម៉ង់ថា ប្រទេសរបស់លោកនឹងស្វាគមន៍តួនាទីរបស់អាមេរិកក្នុងធនាគារអន្តរជាតិដែលគាំទ្រដោយរដ្ឋាភិបាលក្រុងប៉េកាំង ដែលការលើកឡើងនេះបានធ្វើឡើងរយៈពេលប៉ុន្មានម៉ោងបន្ទាប់ពីប្រព័ន្ធផ្សព្វផ្សាយរដ្ឋរបស់ចិនបានពិពណ៌នារដ្ឋាភិបាល ក្រុងវ៉ាស៊ីនតោន ថាឆាប់មួម៉ៅ និងមានការសង្ស័យជ្រុលពេក។
លោក Shi បានប្រាប់សារព័ត៌មានប្រចាំថ្ងៃ Handelsblatt ក្នុងបទសម្ភាសមួយដែលបានចេញផ្សាយនៅថ្ងៃព្រហស្បតិ៍ថា៖ «យើងស្វាគមន៍អាមេរិកក្នុងការចូលរួមជាមួយធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី (AIIB)»។
សហរដ្ឋអាមេរិកយល់ថា ធនាគារ AIIB ដែលជាគ្រឹះស្ថានហិរញ្ញវត្ថុដែលមានដើមទុនចំនួន ៥០ ពាន់លានដុល្លារនេះគឺជាការគំរាមកំហែងចំពោះធនាគារពិភពលោកដែលដឹកនាំដោយរដ្ឋាភិបាលក្រុងវ៉ាស៊ីនតោន។
លោក Shi មានប្រសាសន៍ថា៖ «ធនាគារថ្មីនេះនឹងដើរតួនាទីគាំទ្របន្ថែមដ៏សំខាន់មួយដល់គ្រឹះស្ថានហិរញ្ញវត្ថុអន្តរជាតិផ្សេងទៀត»។ នេះបើយោងតាមការដកស្រង់ព័ត៌មានដែលបានចេញផ្សាយកាលពីថ្ងៃពុធ។
អនុរដ្ឋមន្ត្រីរូបនេះបានបន្តឲ្យដឹងថា៖ «សម្រាប់ធនាគារ AIIB យើងចង់ដឹងអំពីវិធីដែលគ្រឹះស្ថានហិរញ្ញវត្ថុអន្តរជាតិទាំងនេះធ្វើការ ហើយបើអាចទៅរួច យើងនឹងមានលទ្ធភាពចាប់យកគំរូល្អៗរបស់គ្រឹះស្ថានទាំងនោះ»។
លោកបានបន្តថា៖ «គំរូទាំងនោះគឺសំដៅចំពោះស្តង់ដារបរិស្ថានច្បាប់អភិបាលកិច្ច និងការអនុវត្តការទិញល្អៗមួយចំនួនទៀត»។
ការថ្លែងនេះបានធ្វើឡើង បន្ទាប់ពីបារាំង អាល្លឺម៉ង់ និងអ៊ីតាលី កាលពីថ្ងៃអង្គារបានប្រកាសឡើងពីការសម្រេចចិត្តរបស់ខ្លួនដើម្បីក្លាយជាសមាជិកស្ថាបនិករបស់ធនាគារ AIIB នេះ៕
Comments
Post a Comment