Microsoft គ្រោងចេញលក់ Window 10 ជំនាន់ថ្មីក្នុងឆ្នាំនេះ
ក្រុងរ៉េដម៉ុងៈ ក្រុមហ៊ុន Microsoft Corp ដែលកំពុងកែប្រែកម្មវិធីសូហ្វវែរប្រព័ន្ធប្រតិបត្តិការរបស់ខ្លួននៅក្នុងទីផ្សារមួយដែលគ្រប់គ្រងដោយកុំព្យូទ័រចល័តនោះបានឲ្យដឹងថា ក្រុមហ៊ុនរបស់ខ្លួនគ្រោងនឹងចេញកម្មវិធី Windows 10 ជំនាន់ថ្មីនៅក្នុងប្រទេសចំនួន ១៩០ នៅរដូវក្តៅក្នុងឆ្នាំនេះ។
ក្រុមហ៊ុននេះបានឲ្យដឹងកាលពីថ្ងៃពុធនៅក្នុងសេចក្តីថ្លែងការណ៍មួយចំពេលមានការរៀបចំសន្និសីទស្តីពីសហគមន៍វិស្វកម្មហាដវែរ Windows របស់ខ្លួននៅ ទីក្រុងហ្សិនជិន ក្នុង ប្រទេសចិន ថា កម្មវិធីសូហ្វវែរនេះនឹងត្រូវចេញលក់ជា ១១១ ភាសា។ កម្មវិធីនេះនឹងមាន customizations នៃ Windows 10 មួយចំនួន សម្រាប់ទីផ្សារប្រទេសចិន ដូចជាកម្មវិធីជំនួយការផ្ទាល់ Cortana ជាភាសាចិនផងដែរ។
ក្រុមហ៊ុន Microsoft ដែលបានដាក់បង្ហាញកម្មវិធី Windows 10 ដំបូងកាលពីខែកញ្ញា បានឲ្យដឹងថា ប្រព័ន្ធប្រតិបត្តិការថ្មីនេះនឹងដាក់លក់នៅពេលណាមួយក្នុងឆ្នាំនេះ។ កម្មវិធី Windows 10 មានកម្មវិធីស្វែងរកគេហទំព័រថ្មីមួយ ដែលនឹងជំនួសឲ្យកម្មវិធី Internet Explorer សម្រាប់អតិថិជនភាគច្រើន។
ក្រុមហ៊ុន IDC បានឲ្យដឹងកាលពីសប្តាហ៍មុននេះថា ការនាំចេញកុំព្យូទ័រផ្ទាល់ខ្លួនអាចនឹងធ្លាក់ចុះ ៤,៩ ភាគរយនៅឆ្នាំនេះ ពោលគឺខ្ពស់ជាងការព្យាកររបស់ក្រុមហ៊ុនស្រាវជ្រាវមួយនេះនាពេលកន្លងមក។
កាលពីសប្តាហ៍មុន ក្រុមហ៊ុនផលិតបន្ទះឈីបធំជាងគេរបស់ពិភពលោកគឺក្រុមហ៊ុន Intel Corp បានទម្លាក់ការព្យាកររបស់ខ្លួនចំពោះការលក់នៅត្រីមាសទីមួយ ដោយលើកឡើងពីតម្រូវការទាបពីអតិថិជនជាសាជីវកម្ម។
កាលពី ខែមករា ក្រុមហ៊ុន Microsoft ក៏បានប្រកាសពីកម្មវិធីសូហ្វវែរមួយផងដែរដែលមានឈ្មោះថា Windows Holographic និងឧបករណ៍ដែលមានភ្ជាប់កញ្ចក់មួយឈ្មោះថា HoloLens ដែលនឹងអាចឲ្យអ្នកប្រើប្រាស់មើលឃើញរូបភាព 3D ស្របពេលនោះដែលអាចតាមដានសំឡេង ចលនា និងបរិយាកាសជុំវិញអ្នកប្រើប្រាស់ផងដែរ។
ក្រុមហ៊ុន Microsoft បានឲ្យដឹងថា ឧបករណ៍កញ្ចក់នេះ នឹងមានលក់ក្នុងពេលដំណាលគ្នានឹងកម្មវិធី Windows 10។
ក្រុមហ៊ុន Microsoft ក៏មានបំណងកែប្រែកម្មវិធី Windows ស៊េរីមុនៗដូចជាកម្មវិធី Windows 8 ផងដែរ។ ក្រុមហ៊ុនដែលមានមូលដ្ឋានទីក្រុងរ៉េដម៉ុង មួយនេះ បានប្រឈមនឹងភាពមិនសប្បាយចិត្តពីសំណាក់អតិថិជនជាក្រុមហ៊ុនដែលយល់ថា ការបង្កើតកម្មវិធីថ្មីរបស់កម្មវិធី Windows នេះពិបាកប្រើ៕
Comments
Post a Comment